ቢሮው ከንግዱ ማህበረሰብና ከግብር ከፋዮች ጋር ተቀራርቦ በመወያየትና በመስራት በገቢው ዘርፍ የሚስተዋሉ ችግሮች ለመፍታት በትኩረት እየሰራ መሆኑ ተገለፀ፡፡

ህዳር 19/3/2018ዓ.ም

የአዲስ አበባ ከተማ አስተዳደር ገቢዎች ቢሮ ከአዲስ አበባ ከተማ ንግድና ዘርፍ ማሀበራት ም/ቤት የቦርድ አመራሮችና ከ11ንዱም ክፍለ ከተማ የነጋዴ ተወካይ ማህበራት አመራሮች ጋር ይበልጥ ተቀራርቦ ለመስራት በሚያስችሉ ጉዳዮች ላይ ውይይት አካሂዷል፡፡

በውይይቱም የንግዱ ማህበረሰብ ተወካዮች ከገቢዎች ቢሮ ከአገልግሎት አሰጣጥና የግብር ከፋይ መስተንግዶ፣ ከደረሰኝ ባለሙያዎች ቁጥጥርና ስነ ምግባር ፣ ከቀን ገቢ ግምት ፣ ከተሻሻለው የግብር ግብር አዋጅ አተገባበር፣ ከክሪላንስ አገልግሎት አሰጣጥ ቅልጥፍና መስተንግዶ ጋር በተያያዘ ይስተዋላሉ ያሏቸው ችግሮች አንስተው ውይይት አድርገዋል፡፡

ከንግዱ ማህበረሰብ ተወካዮች ለተነሱ ጥያቄዎች ማብራሪያ የሰጡት የቢሮው ኃላፊ አቶ ቢኒያም ምክሩ ተቋማቸው ከአዲስ አበባ የንግድና ዘርፍ ማህበራት ም/ቤትና ከክፍለ ከተማ የንግዱ ማህበረሰብ ተወካዮች ጋር ተቀራርቦ ለመስራት የሚያስችል መድረኮችን በተደጋጋሚ በመፍጠር የሚቀርቡ ቅሬታዎች በጋራ ለመፍታት ጥረት እያደረገ መሆኑን አንስተዋል፡፡

ከዚህ አኳያም ከአገልግሎት አሰጣጥና ከመስተንግዶ፣ ከክሊራንስ አገልግሎት፣ ከሲስተም መቆራረጥ፣ ከባለሙያዎች ስነ ምግባር ጉድለት ጋር በተያያዘ የሚነሱ ቅሬታዎች በአሰራር፣ በአደረጃጀት፣ በቴክኖሎጂ ልማትና የተጠያቂነት አሰራርን በማጠናከር ለመፍታት በትኩረት እየተሰራ ነው ብለዋል፡፡

ከደረሰኝ ቁጥጥር ጋር በተያያዘ የንግዱ ማህበረሰብ ግዢና ሽያጭ በሚፈፅምበት ወቅት በደረሰኝ ብቻ መፈፀምና መገበያየት እንዳለበት የገለፁት ኃላፊው የንግዱ ማህበረሰብ ከባህላዊ የንግድ እንቅስቃሴ በመውጣት የሂሳብ መዝገብ መያዝ ያለበት ግብር ከፋይ በትክክል መረጃውን አደራጅቶ መያዝና ማቅረብ እንዳለበት ጠቁመዋል፡፡

በከተማችን ያለደረሰኝ ግብይቶች ለመቆጣጠር በአሁኑ ወቅት በንግድ ተቋማትና በመጋዘን ከሚካሄድ ቁጥጥር በተጨማሪ በቀንና በለሊት በተሸከርካሪዎች ላይ የሚካሄድ ቁጥጥር በማጠናከር በገቢ ዘርፉ የሚስተዋለውን ስብራት ለማከም በትኩረት እየሰራ መሆኑን አብራርተዋል፡፡

የምርቶች የገበያ ዋጋ ጥናት ተጠቃሚ የሚያደርገው በዋናነት ህጋዊ ግብር ከፋዩን ነው ያሉት አቶ ቢኒያም ከዋጋ ጥናቱ ጥራት ጋር በተያያዘ የሚነሱ ቅሬታዎችን ለመቅረፍ ከግብር ከፋዮች የሚቀርብን ቅሬታ መነሻ በማድረግ ቢሮው በትኩረት የጥናት ስራውን በመስራት እየፈታ ይገኛል ብለዋል፡፡

ለአብነትም ባለፈው ዓመት በ2 ሺህ ምርቶች የዋጋ ጥናት ተካሄዱ ከነበረበት በየጊዜው ቁጥሩን በማሳደግ በአሁኑ ወቅት ወደ 16 ሺህ ምርቶች ለማድረስ ተችሏል ካሉ በኃላ በዚህም የሚስተዋል የጥራት ጉድለት ለማረምና በቀጣይም የዋጋ ጥናት የተካሄደባቸው ምርቶች ብዛት ወደ 100ሺህ በማድረስ ይበልጥ ጥራቱን ለማሻሻል በትኩረት እየተሰራ ነውም ብለዋል፡፡

በአሁኑ ወቅት ቢሮው ተልዕኮውን በብቃት ለማሳካት ሪፎረም ውስጥ እንደሚገኝ የጠቆሙት አቶ ቢኒያም በዚህም ግብር ከፋዩን ለድርድር የሚዳርጉና ለብልሹ አሰራር በር የሚከፍቱ ጉዳዮችን በመለየት ከ24 በላይ አዳዲስ አሰራሮች ተጠንተው ወደ ተግባር ተሸጋግረዋል ሲሉ ተናግረዋል፡፡

ከዚህም በተጨማሪ ከአደረጃጀት ጋር በተያያዘ የነበሩ ችግሮችን ለመቅረፍ እንዲሁም ከአገልግሎት አሰጣጥና ከቁጥጥር ስራዎችን ጋር በተያያዘ የሚስተዋሉ የሌብነትና ብልሹ አሰራሮች ሙሉ በሙሉ በቴክኖሎጂ በመታገዝ ለማፅዳት ጥረት እየተደረገ መሆኑንም አብራርተዋል፡፡

በቀጣይም ቢሮው በቢሮው አገልግሎት አሰጣጥ፣ ልዩ ልዩ አሰራሮች ጋር በተያያዘ ግብር ከፋዩ ቅሬታዎች አሉኝ ካለ ከመደበኛ መድረኮች በተጨማሪ በማንኛውም ቀን በአካል ቢመጣ የቢሮው አመራር የግብር ከፋዮቹን ቅሬታዎች በማድመጥ ተገቢው ምላሽ ለመስጠት ዝግጁ መሆኑንም ገልጸዋል፡፡

የአዲስ አበባ ከተማ የንግድና ዘርፍ ም/ቤት ፕሬዝዳንት ወ/ሮ ዘሃራ መሀመድ በበኩላቸው ቢሮው ከም/ቤቱና ከንግዱ ማህበረሰብ ተወካዮች ጋር ተደጋጋሚ የውይይት መድረኮች በመፍጠር ተቀራርቦ ለመስራት የሚያደርገው ጥረት የሚበረታታ መሆኑን አንስተዋል፡፡

ግብር አሰባሰቡ እና በግብር ከፋዩ የሚነሱ ቅሬታዎችንና ክፍተቶች መፍትሔ ለመስጠት አዳዲስ አሰራሮችንና ቴክኖሎጂዎችን ወደ ተግባር ማሸጋገሩም የሚያበረታታና ተጠናክሮ ሊቀጥል የሚገባው መሆኑን አንስተዋል፡፡

በመጨረሻም የአዲስ ቻምበር የቦርድ አመራሮችና የክፍለ ከተማ የንግዱ ማህበረሰብ ተወካዮች በቢሮ የቁጥጥር ስራዎች ለመከታተል ከኢንሳ ጋር በመቀናጀት የለማና ወደ ተግባር የተሸጋገር ቴክኖሎጂን ጉብኝተዋል፡፡