“ወደ ከተማ የሚገቡ ፣የሚወጡ እንዲሁም ከተማ ውስጥ እንቅስቃሴ የሚያደርጉ ማንኛውም ደረቅ ጭነትና የተለያዩ ሸቀጣ ሸቀጦች የጫኑ ተሽከርካሪዎች ደረሰኝ ስለመያዛቸው ቁጥጥር እያደረግን ነው”- ገቢዎች ቢሮ

ነሀሴ 24 ቀን 2017ዓ.ም፣ አዲስ አበባ፣ገቢዎች ቢሮ

የአዲስ አበባ ከተማ አስተዳደር ገቢዎች ቢሮ በሁሉም የከተማዋ አቅጣጫዎች ወደከተማዋ የሚገቡ፣ከከተማዋ የሚወጡና በከተማዋ ውስጥ የሚንቀሳቀሱ የደረቅ ጭነት ተሽከርካሪዎች ፣ሚኒባሶችና ኣነስተኛ ሽፍን መኪኖች ላይ የመኪና ኦፕሬሽን ስራዎች እያከናወነ መሆኑን አሳውቋል።

ቢሮው እያካሄደ ያለው የመኪና ኦፕሬሽን ስራ ተሽከርካሪዎቹ ጭነው የሚንቀሳቀሱት ልዩ ልዩ ሸቀጦች፣ምርቶችና የኮንስትራክሽን ግብአቶች በህጋዊ ግብይት በደረሰኝ የተፈፀሙ ስለመሆናቸው ለማረጋገጥ ያለመ መሆኑም ተገለፃል፡፡

በዚህም በአንድ ሳምንት በተካሄዱ የቁጥጥር ስራዎች በኮልፌ ቀራኒዮ ክፍለ ከተማ 11 ፣ በንፋስ ስልክ ላፍቶ ክፍለ ከተማ 4 ፣ በአቃቂ ቃሊቲ 5 ፣በለሚ ኩራ 7 እንዲሁም በጉለሌ 7 ተሸክርካሪዎች ዕለታዊ ደረሰኝ ሳይዙ በከተማዋ ውስጥ ሲንቀሳቀሱ ተገኝተው አስተዳደራዊ የቅጣት እርምጃ የተወሰደ ሲሆን ለጫኑት እያንዳንዱ ዕቃም ደረሰኝ እንዲቆርጡ መደረጋቸው ታውቋል፡፡

በመሆኑም በከተማዋ ጭነት የጫኑ ማንኛውም አይነት ተሽከርካሪዎች፣ ተሳቢዎች፣ ሚኒባሶች እና ሽፍን መኪኖች ለጫኑት እቃ ዕለታዊ ደረሰኝ የተቆረጠበት መረጃ ስለመያዛቸው የማረጋገጥ ተግባር ተጠናክሮ የሚቀጥል መሆኑ ተገልፆል፡፡

በቢሮው እየተካሄደ የሚገኝ የመኪና ላይ የቁጥጥር ስራ በሁሉም አቅጣጫዎች ላይ የተለያዩ የኮንስትራክሽን ግብአቶች ፣ሸቀጦች እና የምግብ ምርቶችን ከቦታ ቦታ በሚያንቀሳቅሱበት ጊዜ ደረሰኝ እንዲይዙ የማድረግ ስራ መሆኑም ታውቋል፡፡

ቢሮው ትልልቅም ይሁኑ ትንንሽ መኪኖች እንቅስቃሴ ሲያደርጉ ከከተማው ትራፊክ ማኔጅመንት ባለሥልጣን ጋር በመቀናጀት ደረሰኝ ስለመያዛቸው የማረጋገጥና ያልያዙት ላይ አስተዳደራዊ ቅጣት በመቅጣት ለእያንዳንዱ ለጫኑት እቃ ደረሰኝ እንዲቆርጡ እየተደረገ ነው ተብሏል፡፡

ስለሆነም ማነኛውም የተሽከርካሪ ባለቤትና አሽከርካሪ እንዲሁም ነጋዴ በመኪና ላይ ጭኖ ለሚያንቀሳቅሰው ማነኛውም ምርት በዕለቱ የተቆረጠ ደረሰኝ የመያዝና ለከተማው የገቢዎች ቢሮ የቁጥጥር ሰራተኞች የማሳየት ሀላፊነት እንዳለበት ቢሮ አሳስቧል።